O‘zbekiston hukumati «Halol» talablariga muvofiq mahsulot va xizmatlarni sertifikatlashtirish tartibini belgilovchi nizomni tasdiqladi. Ushbu hujjat asosida quyidagilar tasdiqlanadi:
- Mahsulot va xizmatlarni «Halol» talablariga muvofiq sertifikatlashtirish tartibi;
- «Halol» talablariga muvofiq sertifikatlashtirilgan mahsulot va xizmatlarni davriy ravishda baholash.
Yangi qarorga ko‘ra, mahsulot va xizmatlarni «Halol» talablariga muvofiq sertifikatlash uchun maxsus organ tashkil etiladi. Sertifikatlashtirishda va talablarni belgilashda, Islom mamlakatlari standartlari va metrologiya instituti (SMIIC) tomonidan qabul qilingan xalqaro standartlarga ustuvorlik beriladi.
2025-yil 1-maydan boshlab, Islom mamlakatlari standartlari va SMIIC standartlari asosida sertifikatlashtirilgan mahsulot va xizmatlarga «Halol» belgisini qo‘yishga ruxsat etiladi.
O‘zbekiston texnik jihatdan tartibga solish agentligi va Din ishlari bo‘yicha qo‘mita birgalikda olti oy ichida mahsulot va xizmatlarni «Halol» talablariga muvofiq sertifikatlashtiradigan organni tashkil etadi. Bu organ xalqaro akkreditatsiyadan o‘tkazilishi lozim. Shuningdek, «Halol» belgisi shakli va o‘lchami uchun standartlar ishlab chiqilib, tasdiqlanishi kerak.
«Halol» sertifikati – mahsulot yoki xizmatning Islom qoidalariga muvofiq ekanligini tasdiqlovchi hujjatdir, va «Halol» belgisini qo‘yish bu mahsulot yoki xizmatning «Halol» talablariga mosligini bildiradi.
