Bir unsiya oltinning narxi bir yil ichida deyarli 50% ga o‘sdi. So‘nggi kunlarda bu o‘sish AQSh hukumatining «shatdaun» (ishini to‘xtatishi) fonida tezlashdi. O‘tgan haftada rekord uch kun ketma-ket yangilandi, va 6-oktabr kuni narx bir unsiya uchun 4 ming dollarga yaqinlashdi.
Nyu-York fond birjasida savdolar ochilganda, bir unsiya oltinning narxi 3 886 ming dollardan oshdi, kunlik maksimum esa 3 969 ming dollardan yuqori bo‘ldi. Berlin vaqti bilan 23:00 da (Toshkent vaqti bilan 02:00) narx 3 960 ming dollarga tushdi — bu ochilish narxidan 74 dollarga yuqoridir.
O‘tgan hafta boshida bir unsiya oltinning narxi uch marta tarixiy maksimumni yangiladi. O‘tgan besh ish kuni davomida narx 3 757 ming dollardan 3 885 ming dollargacha o‘sdi, ya’ni taxminan 130 dollarga yoki 3% dan ko‘proqqa oshdi.
O‘sish sabablaridan biri — siyosiy beqarorlik
Oltin narxining oshishiga ko‘p jihatdan 1-oktabr kuni boshlangan shatdaun – AQSh hukumatining ishini to‘xtatishi sabab bo‘ldi. Bu holat Senatning Demokratik va Respublikachilar partiyalari a’zolari tomonidan taqdim etilgan keyingi yil uchun federal budjet bo‘yicha takliflarning birortasini ham qabul qila olmaganligi bilan bog‘liq.
Ko‘plab hukumat organlari ishining to‘xtashidan tashqari, shatdaun, masalan, 3-oktabr kuni e’lon qilinishi kerak bo‘lgan mehnat bozori to‘g‘risidagi hisobotning nashr etilmasligiga olib keldi. Bunday vaziyat investorlarni xavotirga solmoqda va ular o‘z pullarini iqtisodiyotning biror bir sektoriga sarmoya kiritish o‘rniga, vaqtincha «tinch boshpana»da saqlashni afzal ko‘rishmoqda.
Oltin narxi shatdaundan oldin ham o‘sgan
Bloomberg’ning qayd etishicha, 2025-yil boshidan beri qimmatbaho metallning bir unsiyasi narxi deyarli 50% ga o‘sgan. Taqqoslash uchun, 1-yanvar kuni u 2 623 ming dollarni tashkil etgan. Agentlik fikricha, oltin narxining o‘sishiga «Prezident Donald Tramp keltirib chiqargan iqtisodiy va geosiyosiy noaniqlikning jiddiy o‘sishi» sabab bo‘lmoqda.
Yana bir ehtimoliy sabab – AQSh Federal zaxira tizimi (FZT) tomonidan sentabrda to‘qqiz oy ichida birinchi marta foiz stavkasining 25 bazis punktga, ya’ni 4,25−4,5% dan 4−4,25% gacha pasaytirilishi haqidagi qaroridir.
Deutsche Bank prognozi: 2026-yilda bir unsiya narxi 4 ming dollardan oshadi
Deutsche Bank ekspertlari sentabr oyining o‘rtalarida yoki kelgusi yilda qimmatbaho metallning narxi bir unsiya uchun 4 000 dollargacha ko‘tarilishini prognoz qilishgan edi. Reuters yozishicha, buning sabablari orasida markaziy banklar tomonidan yuqori talab, dollarning potensial zaiflashishi va FZT stavkalarining pasayishda davom etishi bor.