O‘zbekiston Respublikasi Markaziy banki 2026–2028 yillarga mo‘ljallangan pul-kredit siyosati bo‘yicha asosiy yo‘nalishlarni taqdim etdi. Unda joriy iqtisodiy holat, mavjud xavf va omillar, inflyatsiyaning kutilayotgan dinamikasi hamda kelgusi yillarda amalga oshiriladigan pul-kredit choralariga oid ma’lumotlar yoritilgan.
Markaziy bankning asosiy vazifasi sifatida narxlar barqarorligi ta’minlanib, inflyatsiya darajasini 2027 yil yakuniga qadar 5 foizgacha pasaytirish vazifasi belgilangan. Hujjatda qayd etilishicha, ichki inflyatsion bosimlar asta-sekin yumshab borishi, tashqi bozorlarda narxlar barqarorlashuvi va monetar sharoitlarning qat’iyligi bu jarayonni qo‘llab-quvvatlaydi.
2026 yil oxiriga borib inflyatsiya 7 foiz atrofida bo‘lishi, 2027 yilga kelib esa belgilangan target ko‘rsatkichiga yaqinlashishi prognoz qilinmoqda.
2025 yil davomida mamlakat iqtisodiyoti barqaror o‘sishni namoyon etdi. Investitsion faollikning kuchayishi, aholining real daromadlarining oshishi, eksportning o‘sishi iqtisodiy kengayishning asosiy omillari bo‘ldi. Xorijiy investitsiyalar hajmi ham oshgani kreditlar o‘sishiga ijobiy ta’sir ko‘rsatdi.
Markaziy bankning ma’lumotlariga ko‘ra, bazaviy inflyatsiya pasayishni davom ettirmoqda. Grafiklarda ham umumiy va bazaviy inflyatsiyaning asta-sekin pastga yo‘naltirilgani ko‘rinadi.
Hujjatda kelgusi yillarda pul-kredit siyosatini yanada samarali qilish bo‘yicha qator rejalarga e’tibor qaratilgan. Ular orasida:
- ichki bozorlarda raqobatni kuchaytirish,
- tarif va notarial cheklovlarni bosqichma-bosqich qisqartirish,
- import konsentratsiyasini pasaytirish,
- energiya ta’minoti barqarorligini oshirish,
- transport infratuzilmasini yaxshilash orqali taklifni kengaytirish.
Ushbu choralar narxlar barqarorligini ta’minlashga va iqtisodiy o‘sishni qo‘llab-quvvatlashga xizmat qiladi.
Hujjatda inflyatsiyaning o‘sishiga sabab bo‘lishi mumkin bo‘lgan asosiy xavf omillari ham sanab o‘tilgan:
- hamkor davlatlar valyutalarining keskin qadrsizlanishi,
- oltin narxlarining pasayishi,
- import oziq-ovqat narxlarining o‘sishi,
- energiya uzilishlari,
- ob-havo inqirozlari,
- global iqtisodiy noaniqliklar.
Markaziy bank bu omillarni hisobga olgan holda siyosat choralarini moslashtirib borishini bildirgan.
2026–2028 yillarga mo‘ljallangan prognozlarga ko‘ra, O‘zbekiston iqtisodiyoti kelgusi yillarda 6–7 foiz atrofida barqaror o‘sishni davom ettiradi. Xizmatlar sohasi, qurilish va sanoat tarmoqlari o‘sishning asosiy drayverlari bo‘lib qoladi.
Tarmoqlar kesimida taqdim etilgan jadval va grafiklar yalpi talabning barqarorlashayotganini, taklifning ma’lum segmentlarda kengayayotganini ko‘rsatadi.
