2025-yilning yanvar–noyabr oylarida O‘zbekistonda avtomobilsozlik sanoati barqaror o‘sish sur’atlarini namoyon etdi. Milliy statistika qo‘mitasi ma’lumotlariga ko‘ra, hisobot davrida respublikada jami 419,3 ming dona yengil avtomobil ishlab chiqarilgan bo‘lib, bu ko‘rsatkich 2024-yilning mos davriga nisbatan sezilarli oshgan.
2025-yilda yuk avtomobillari ishlab chiqarish hajmi 4 081 donani tashkil etdi. Taqqoslash uchun, 2024-yilning yanvar–noyabr oylarida ushbu ko‘rsatkich 3 116 dona bo‘lgan. Bu yuk avtomobillari ishlab chiqarishida ham ijobiy dinamika saqlanib qolayotganini ko‘rsatadi.
Yengil avtomobillar segmentida esa ishlab chiqarish hajmi 385,1 ming donadan 419,3 ming donagacha oshib, avtomobilsozlik sanoatining asosiy drayveri bo‘lib qolmoqda.
Model va brendlar kesimida tahlil shuni ko‘rsatadiki, 2025-yilda ayrim avtomobil turlari bo‘yicha ishlab chiqarish hajmi sezilarli darajada ko‘paygan. Jumladan:
- Maxsus yengil avtomobillar ishlab chiqarish hajmi ikki barobardan ko‘proq oshib, 49 372 donaga yetgan (2024-yilda – 23 031 dona).
- Tracker rusumidagi avtomobillar ishlab chiqarish 40 718 donadan 47 804 donaga ko‘paygan.
- KIA avtomobillari ishlab chiqarish hajmi 19 328 donadan 24 507 donaga yetgan.
- Chery brendi bo‘yicha ishlab chiqarish 6 301 donadan 8 627 donaga oshgan.
- Haval avtomobillari ishlab chiqarish hajmi qariyb to‘rt barobar oshib, 8 891 donani tashkil etgan.
- BYD elektromobillari ishlab chiqarish hajmi 2 198 donadan 17 510 donagacha keskin ko‘paygan.
Ayni paytda ayrim an’anaviy modellarda pasayish kuzatildi. Xususan, “Cobalt”, “Damas” va “Onix” rusumlari bo‘yicha ishlab chiqarish hajmi 2024-yilga nisbatan kamaygan.
