O‘zbekistonda mobil aloqa foydalanuvchilari uchun yangi qulaylik joriy etildi — endilikda mobil raqamni boshqa shaxs nomiga o‘tkazish jarayoni to‘liq onlayn amalga oshiriladi.
Avvallari mobil raqam egasini o‘zgartirish uchun har ikki tomon — amaldagi egasi va yangi foydalanuvchi — aloqa operatori ofisiga borishi, navbat kutishi va hujjatlarni joyida imzolashi talab etilardi. Endilikda esa bu jarayonlar raqamlashtirildi va ularni uydan chiqmasdan turib bajarish mumkin.
Xizmatdan foydalanish uchun my.gov.uz portali yoki MyGov mobil ilovasiga kirib, “Mobil raqamni qayta rasmiylashtirish” xizmatini tanlash, kerakli ma’lumotlarni to‘ldirish va ariza yuborish kifoya.
Muhim jihat shundaki, mobil raqamni topshirayotgan va qabul qilayotgan shaxslar arizani MyID orqali tasdiqlashlari shart.
Mazkur xizmat barcha mobil aloqa operatorlarida bosqichma-bosqich joriy etilmoqda. Xizmat narxi operatorlarning tarif siyosatiga bog‘liq bo‘lib, ayrim hollarda yaqin qarindoshlar uchun bepul amalga oshirilishi mumkin.
Shuningdek, yaqinda qabul qilingan nizomga ko‘ra, foydalanuvchi akkauntiga faqat o‘ziga yoki yaqin qarindoshlariga tegishli bank kartalari va hisoblarni biriktirish mumkin. Ro‘yxatdan o‘tishda telefon raqami JSHSHIR bilan mosligi tekshiriladi. Agar moslik bo‘lmasa, tizimga kirish cheklanadi.
Markaziy bankning ma’lum qilishicha, ushbu talablar asosan yangi foydalanuvchilarga nisbatan qo‘llaniladi.
Endilikda mobil raqamni boshqa nomga o‘tkazish uchun ofisga borish shart emas — barcha jarayonlarni onlayn tarzda amalga oshirish mumkin.
