2025-yil 31-iyul kuni Telegram ilovasi bir vaqtning o‘zida bir nechta yangi funksiyalarni joriy etdi. Endi foydalanuvchilar ochiq postlarni qidirishlari, hikoyalarni albomlarga birlashtirishlari, sovg‘alar kolleksiyasini yaratishlari, o‘z reytinglarini kuzatishlari va mini-ilovalarni boshqarishlari mumkin.
Postlar bo‘yicha qidiruv
Telegram’da yangi “Postlar” bo‘limi orqali siz ochiq kanallardagi postlarni matn orqali qidirishingiz mumkin. Bu global qidiruv orqali ijtimoiy tarmoqlardagi yangiliklar, maslahatlar, memlar va boshqa ko‘plab kontentlarni tezda topish mumkin.
Ushbu funksiyadan hozircha Telegram Premium obunachilari foydalanishlari mumkin.
Hikoya albomlari
Endilikda Telegram’da bir vaqtning o‘zida bir nechta hikoyalarni joylashtirish va ularni albomga birlashtirish mumkin. Bu sizga o‘xshash voqealarni yoki mavzularni bitta guruhga jamlash imkonini beradi.
Kanal egalari bu funksiyani mahsulot turlarini yoki kontent seriyalarini bir joyga to‘plash uchun ishlatishlari mumkin.
Sovg‘alar kolleksiyasi
Endilikda Telegram’dagi Premium sovg‘alarni turli to‘plamlarga (kolleksiyalarga) ajratish mumkin. Har bir sovg‘a bir nechta kolleksiyaga tegishli bo‘lishi mumkin. Shuningdek, siz ularni nomlash, saralash va boshqalar bilan bo‘lishishingiz mumkin.
Profil reytingi
Telegram har bir foydalanuvchi uchun reyting tizimini joriy etdi. Ushbu reyting Telegram’dagi ixtiyoriy to‘lovlar (yulduzlar), pullik kontent, sovg‘alar va boshqa interaktiv harakatlar asosida shakllanadi.
Reyting qancha yuqori bo‘lsa, boshqalar sizga ko‘proq ishonch bildirishi mumkin. Ayniqsa, kanal egalari foydalanuvchi reytingiga e’tibor qaratadilar.
Yulduzlar (Stars) qaytarilganda yoki o‘chirilganda reyting pasayadi.
Premium sovg‘alar
Endi Telegram Premium foydalanuvchilari uchun cheklangan miqdordagi maxsus sovg‘alar mavjud. Ular eksklyuziv animatsiyalar va noyob dizaynlarga ega. Boshqa foydalanuvchilar bu sovg‘alarni ko‘rishlari mumkin, lekin faqat Premium obunachilar ularni yuborish imkoniyatiga ega.
BotFather mini ilovasi
Dasturchilar uchun @BotFather endi mini-ilovalarga tegishli barcha sozlamalarni boshqarish imkoniyatini beradi. Endi siz quyidagilarni amalga oshirishingiz mumkin:
- Ilova nomi, tavsifi va ikonkasini o‘zgartirish
- Geolokatsiya va joylashuvga asoslangan ilovalarni qo‘llab-quvvatlash
- Obuna bo‘lish funksiyasi
- To‘liq ekran rejimi
- Har xil turdagi tugmalar va interfeyslar
