O‘zbekistonda bank kartalari orqali mablag‘larni yechib olish tartibiga muhim o‘zgarish kiritildi. Endilikda moliyaviy tashkilotlar kredit va boshqa majburiyatlar uchun pulni avtomatik tarzda yechib olayotganda karta balansini to‘liq “nolga” tushira olmaydi.
Minimal qoldiq joriy etildi
Uzcard ma’lum qilishicha, 15-apreldan boshlab akseptsiz (ya’ni mijoz tasdiqisiz avtomatik) yechib olishlarda karta hisobida kamida bazaviy hisoblash miqdorining 3 baravari — hozirgi hisobda 1 mln 236 ming so‘m mablag‘ saqlanib qolishi shart.
Bu degani:
- Agar sizda kredit, mikroqarz yoki bo‘lib to‘lash majburiyati bo‘lsa ham
- Bank faqat belgilangan limitdan ortiqcha summani yechib oladi
- Karta balansi to‘liq tugatilmaydi
Akseptsiz yechib olish nima?
Akseptsiz yechib olish — bu bank yoki moliyaviy tashkilotlar tomonidan qarzlarni undirish uchun mablag‘ni avtomatik tarzda, har safar alohida tasdiq olmasdan yechib olish jarayonidir. Bu odatda kredit, bo‘lib to‘lash yoki mikroqarz to‘lovlari uchun qo‘llaniladi.
Muhim istisno bor
Mazkur cheklov barcha holatlarga tegishli emas. Agar mijoz:
- karta ma’lumotlarini o‘zi kiritsa
- va to‘lovni SMS-kod (OTP) orqali tasdiqlasa
unda mablag‘ to‘liq miqdorda yechib olinishi mumkin.
Yangi tartib kimlar uchun amal qiladi?
Mazkur yangilik to‘lov tizimlari darajasida joriy etilmoqda. Hozircha bu haqida Uzcard rasmiy e’lon berdi.
Shuningdek, yaqin kunlarda HUMO tizimi ham shunga o‘xshash tartibni joriy etishi kutilmoqda.
