Milliy statistika qo‘mitasi ma’lumotlariga ko‘ra, 2025-yilning yanvar–noyabr oylarida O‘zbekistonda yirik korxonalar tomonidan 37,9 trillion so‘mlik kiyim-kechak mahsulotlari ishlab chiqarilgan. Ushbu ko‘rsatkich 2024-yilning mos davriga nisbatan 24,3 foizga oshgan bo‘lib, sohada barqaror o‘sish sur’atlari saqlanib qolayotganini ko‘rsatadi.
Hududlar kesimida tahlil qilinganda, kiyim ishlab chiqarish hajmi bo‘yicha Andijon viloyati yetakchi bo‘lib qolmoqda. Mazkur hududda 11 oy davomida 17,2 trillion so‘mlik kiyim-kechak mahsulotlari ishlab chiqarilgan. Bu respublika bo‘yicha umumiy hajmning sezilarli qismini tashkil etadi.
Keyingi o‘rinlarda Namangan viloyati (3,7 trillion so‘m) va Toshkent viloyati (3,6 trillion so‘m) qayd etilgan. Toshkent shahrida esa kiyim ishlab chiqarish hajmi 2,6 trillion so‘mni tashkil etgan.
Shuningdek, Farg‘ona viloyatida 2,2 trillion so‘mlik, Navoiy viloyatida 1,9 trillion so‘mlik, Qashqadaryo viloyatida 1,6 trillion so‘mlik va Buxoro viloyatida 1,5 trillion so‘mlik kiyim-kechak mahsulotlari ishlab chiqarilgan. Samarqand viloyati ko‘rsatkichi esa 1,2 trillion so‘mni tashkil etgan.
Nisbatan kamroq hajm Surxondaryo viloyatida (562 milliard so‘m), Jizzax viloyatida (524,1 milliard so‘m), Qoraqalpog‘iston Respublikasida (497,4 milliard so‘m), Sirdaryo viloyatida (390,6 milliard so‘m) va Xorazm viloyatida (387,8 milliard so‘m) qayd etilgan.
Mutaxassislar ta’kidlashicha, kiyim-kechak ishlab chiqarish hajmining oshishiga yengil sanoat korxonalarida quvvatlarning kengaytirilishi, eksportga yo‘naltirilgan ishlab chiqarishning ko‘payishi hamda ichki bozordagi talabning ortishi asosiy omil bo‘lmoqda.
Ushbu ko‘rsatkichlar yengil sanoat tarmog‘i mamlakat sanoat ishlab chiqarishida muhim o‘rin egallab borayotganini va hududlar kesimida sanoat salohiyati tobora mustahkamlanayotganini ko‘rsatadi.
