O‘zbekistonda ish haqi o‘sishda davom etmoqda. Markaziy bankning 2026-yil II chorakdagi “Mehnat bozori sharhi”ga ko‘ra, yanvar–iyun oylarida nominal ish haqi yillik hisobda 18,4 foizga, real ish haqi esa 10,9 foizga oshgan.
Natijada mamlakat bo‘yicha o‘rtacha oylik ish haqi 7,1 mln so‘mni tashkil etgan. Markaziy bank real ish haqining 10,9 foizlik o‘sishini so‘nggi yillardagi eng yuqori ko‘rsatkich sifatida qayd etgan.
Eng yuqori real o‘sish Jizzaxda
Hududlar kesimida real ish haqi o‘sishi bo‘yicha eng yuqori natija Jizzax viloyatida — 13,3 foiz qayd etilgan.
Keyingi o‘rinlarda:
- Namangan — 11,8%
- Toshkent shahri — 10,7%
- Toshkent viloyati — 10,5%
- Qashqadaryo — 9,7%
- Samarqand — 9,5%
- Buxoro — 9,4%
- Sirdaryo — 9,3%
Eng past real ish haqi o‘sishi esa Andijonda — 7,9% va Qoraqalpog‘istonda — 8,6% qayd etilgan.
Markaziy bankning baholashicha, 2026-yilda hududlar o‘rtasidagi real ish haqi tafovutlari avvalgi yillarga nisbatan qisqargan. Bu ayrim hududlarda inflyatsion bosimning pasayishi va aholining xarid qobiliyati yaxshilanganini ko‘rsatadi.
Eng katta maosh moliya va IT sohalarida
Sohalar bo‘yicha eng yuqori o‘rtacha ish haqi moliya va sug‘urta faoliyatida — 19,1 mln so‘mni tashkil qilgan.
Axborot va kommunikatsiya xizmatlari sohasida esa o‘rtacha ish haqi 17,4 mln so‘m bo‘lgan.
Aksincha, eng past o‘rtacha ish haqi:
- qishloq xo‘jaligida — 3,5 mln so‘m;
- ijtimoiy xizmatlarda — 4,7 mln so‘m.
Shunday qilib, moliya va sug‘urta sohasidagi o‘rtacha ish haqi qishloq xo‘jaligidagi ko‘rsatkichdan qariyb 5,5 baravar yuqori.
Biroq Markaziy bank ayrim past maoshli sohalarda, xususan, ijtimoiy xizmatlar va qishloq xo‘jaligida ish haqi o‘sishining tezlashgani daromadlar o‘rtasidagi tafovut asta-sekin qisqarayotganidan dalolat berishini qayd etgan.
Qaysi sohalarda ish haqi tezroq oshmoqda?
2026-yilning birinchi yarmida ish haqining eng yuqori o‘sishi:
- tashish va saqlash — 22,8%;
- ijtimoiy xizmatlar — 20,2%;
- qurilish — 19,9%.
Markaziy bank ma’lumotlariga ko‘ra, qurilish, sanoat hamda tashish va saqlash sohalarida ish haqi o‘sishi sezilarli tezlashgan. Bu tarmoqlarda mehnatga talab yuqoriligi va malakali kadrlar uchun ish beruvchilar o‘rtasidagi raqobat kuchayayotganini ko‘rsatishi mumkin.
Ish haqi oshmoqda, ammo vakansiyalar kamaygan
Mehnat bozoridagi yana bir muhim tendensiya — ish haqi o‘sayotgan bir paytda yangi bo‘sh ish o‘rinlari sonining qisqarishi.
2026-yil II choragida biznes subyektlari tomonidan e’lon qilingan vakansiyalar soni o‘tgan yilning shu davriga nisbatan 9,8 foizga kamaygan.
Vakansiyalar qisqarishi asosan:
- chakana savdo;
- ishlab chiqarish;
- boshqa yo‘nalishlar
hissasiga to‘g‘ri kelgan.
Bundan tashqari, ish izlovchilar faolligi yuqori darajada saqlanib qolgan. Rezyumelar sonining o‘sishi vakansiyalar sonining o‘sishidan sezilarli darajada yuqori bo‘lgan. Markaziy bank buni ishchi kuchi taklifi va unga bo‘lgan talab o‘rtasidagi tafovut kengayib, mehnat bozorida raqobat kuchayayotgani bilan izohlaydi.
Bandlik 5,2 foizga oshgan
Shu bilan birga, iqtisodiyotdagi bandlik ko‘rsatkichlari ijobiy qolmoqda.
2026-yil I choragida iqtisodiyotda bandlar soni o‘tgan yilning mos davriga nisbatan 5,2 foizga oshgan. Bu so‘nggi to‘rt yildagi eng yuqori o‘sish bo‘lgan.
Bandlikning oshishida asosan sanoat va xizmatlar, jumladan, axborot va aloqa, moliya va sug‘urta hamda boshqa xizmatlar muhim rol o‘ynagan. Sanoat va qurilishning bandlikdagi hissasi ham oshgan.
Markaziy bank ma’lumotlariga ko‘ra, qishloq xo‘jaligida bandlikning qisqarishi davom etmoqda. Bu ishchi kuchining qishloq xo‘jaligidan yuqori unumdorlikka ega xizmatlar sohasiga bosqichma-bosqich siljiyotganini ko‘rsatadi.
Korxonalar soni ham oshmoqda
2026-yil 1-iyun holatiga O‘zbekistonda iqtisodiyotda faoliyat yuritayotgan korxona va tashkilotlar soni 471 mingtaga yetgan.
Bu ko‘rsatkich yil boshiga nisbatan 7,2 foizga ko‘p.
Markaziy bank korxonalar sonining ortishi mehnat resurslariga bo‘lgan talabni kengaytirish uchun zamin yaratayotganini qayd etadi.
Biroq biznesning kelgusi rejalari biroz ehtiyotkorroq. Ish o‘rinlari sonini oshirishni kutayotgan korxonalar ulushi mart oyidagi 40 foizdan iyunda 34 foizgacha tushgan. Aksincha, ish o‘rinlarini qisqartirishni kutayotgan tadbirkorlar ulushi I chorakdagi 6,6 foizdan II chorakda 9,2 foizgacha oshgan.
Mehnat migrantlari O‘zbekistonga 9,3 mlrd dollar yuborgan
Mehnat bozori sharhida migrantlar pul o‘tkazmalari ham alohida qayd etilgan.
2026-yilning birinchi yarmida O‘zbekistonga mehnat muhojirlari tomonidan yuborilgan pul o‘tkazmalari I chorakda 3,8 mlrd dollar, II chorakda esa 5,5 mlrd dollarni tashkil etgan.
Yillik o‘sish mos ravishda 12,9 foiz va 13,1 foiz bo‘lgan. Shu tariqa, birinchi yarim yillikda pul o‘tkazmalari jami 9,3 mlrd dollarga yetgan.
Pul o‘tkazmalari geografiyasi ham kengaymoqda. Yanvar–iyun oylarida Qozog‘istondan kelgan o‘tkazmalar 28,2 foiz, AQSHdan 18,8 foiz, Turkiyadan 14,2 foiz, Janubiy Koreyadan 11,4 foiz, Rossiyadan esa 8,8 foizga oshgan.
Rossiyaga mehnat migratsiyasi kamaygan
Shu bilan birga, Rossiyaga ishlash maqsadida borayotgan O‘zbekiston fuqarolari sonida pasayish kuzatilgan.
2026-yil yanvar–iyun oylarida Rossiyaga ishlash maqsadida borgan O‘zbekiston fuqarolari soni 1,18 mln nafarni tashkil etgan. Bu o‘tgan yilning mos davriga nisbatan 13,2 foizga kam.
Patent asosida ishlayotgan O‘zbekiston fuqarolari soni esa yillik hisobda 9,2 foizga qisqargan.
Boshqa tomondan, mehnat migratsiyasi geografiyasi kengaymoqda. 2025-yil yakuniga kelib Turkiya, Janubiy Koreya, Yevropa va AQSHdagi O‘zbekistonliklar soni qariyb 320 ming nafarga yetgan. 2026-yil 1-iyul holatiga Turkiyada 70 ming, Janubiy Koreyada esa 102,2 ming nafar O‘zbekiston fuqarosi qayd etilgan.
Umuman, mehnat bozorida nima o‘zgarmoqda?
Markaziy bankning II chorak sharhi O‘zbekiston mehnat bozorida bir vaqtning o‘zida ikki xil jarayon kechayotganini ko‘rsatmoqda.
Bir tomondan, ish haqi, bandlik va korxonalar soni oshmoqda. Real ish haqining 10,9 foizga o‘sishi aholining xarid qobiliyati yaxshilanayotganini, boshqa tomondan, vakansiyalar sonining qisqarishi va rezyumelar sonining yuqori o‘sishi ishchi kuchi taklifi va talab o‘rtasidagi tafovut kuchayayotganini ko‘rsatmoqda.
Markaziy bankning ta’kidlashicha, real daromadlarning o‘sishi kelgusida iste’mol talabini qo‘llab-quvvatlashi mumkin. Shu bilan birga, bu inflyatsion bosimning kuchayishiga ham olib kelishi ehtimoli mavjud.
Ya’ni, 2026-yilning birinchi yarmida O‘zbekistonda ish haqi va bandlik bo‘yicha ijobiy dinamika saqlanib qolgan, biroq ish beruvchilarning yangi ish o‘rinlari yaratish bo‘yicha kutilmalari biroz ehtiyotkorlashgan.
