2025-yil 29-oktabr savdolari ochilishi bilan Nvidia aksiyalari qariyb 5 foizga oshib, bir dona aksiya narxi $211 ga yetdi. Shu tariqa kompaniya tarixda ilk bor bozor qiymati $5 trilliondan oshgan korporatsiyaga aylandi.
Bir kun avval Nvidia rahbari Jensen Xuang kompaniya “Blackwell va Rubin” avlodlari orasidagi chiplar sotuvi hajmi $500 milliardga yetishi mumkinligini ma’lum qilgan edi. Shuningdek, u AQSh hukumati uchun yettita superkompyuter qurish rejalashtirilayotganini ham bildirgan.
Eslatib o‘tamiz, 2023-yil iyunida Nvidia’ning bozor qiymati ilk bor $1 trillionga yetgan, bu esa sun’iy intellektni o‘qitish uchun protsessorlarga bo‘lgan talabning keskin ortishi bilan bog‘liq edi. 2024-yilga kelib kompaniya qiymati uch barobar oshib, Apple va Microsoft’ni ortda qoldirdi.
2025-yil boshidan buyon Nvidia aksiyalari narxi yana 50 foizga oshdi. Iyul oyida kompaniya kapitalizatsiyasi $4 trillionni bosib o‘tgan edi.
Mutaxassislarning ta’kidlashicha, Nvidia aksiyalarining o‘sishi investorlar ishonchining yuqoriligidan dalolat beradi. Ularning fikricha, sun’iy intellekt uchun hisoblash quvvatlariga bo‘lgan talab yaqin yillarda ham o‘sishda davom etadi.