2026-yilning yanvar-iyul oylarida O‘zbekiston ichki valyuta bozorida faollik sezilarli darajada oshdi. Yetti oy davomida yuridik va jismoniy shaxslar tomonidan banklardan 38,2 mlrd dollarlik xorijiy valyuta sotib olindi. Bu 2025-yilning mos davridagi 32,5 mlrd dollarga nisbatan 17,7 foizga ko‘p.
Talabning asosiy qismi biznes subyektlariga to‘g‘ri kelgan. Yuridik shaxslar tomonidan 30 mlrd dollar, jismoniy shaxslar tomonidan esa 8,2 mlrd dollar miqdorida xorijiy valyuta xarid qilingan.
Taqqoslash uchun, 2024-yilning yanvar-iyul oylarida ushbu ko‘rsatkichlar mos ravishda 21 mlrd va 5,4 mlrd dollar bo‘lgan. 2025-yilda esa korxonalar 26 mlrd dollar, aholi 6,5 mlrd dollarlik xorijiy valyuta sotib olgan. Shu sababli 2026-yilgi ko‘rsatkich so‘nggi yillarning dastlabki yetti oyi uchun eng yuqori darajalardan biriga aylandi.
Valyuta taklifi ham 28 foizga oshdi
Hisobot davrida bozorga taklif qilingan xorijiy valyuta hajmi ham sezilarli oshgan. Aholi va korxonalar tomonidan banklarga jami 33 mlrd dollar miqdorida valyuta sotilgan.
Bu 2025-yilning yanvar-iyul oylariga nisbatan 7,2 mlrd dollar yoki 28 foizga ko‘p.
Jumladan:
- jismoniy shaxslar — 14,6 mlrd dollar;
- yuridik shaxslar — 18,4 mlrd dollar.
Shunday qilib, 2026-yilda valyuta taklifi talabga nisbatan tezroq o‘sayotgan bo‘lsa-da, umumiy hajm bo‘yicha taklif hali ham talabdan past bo‘lib qolmoqda.
Natijada yanvar-iyul oylarida ichki valyuta bozoridagi jami oldi-sotdi hajmi qariyb 71,2 mlrd dollarni tashkil etdi.
So‘m 0,4 foizga mustahkamlandi
Valyuta bozoridagi yuqori faollikka qaramay, so‘mning AQSh dollariga nisbatan keskin qadrsizlanishi kuzatilmadi.
2026-yilning yanvar-iyul oylarida dollar kursi 11 910–12 320 so‘m diapazonida shakllandi. Hisobot davri yakuniga kelib, milliy valyuta dollarga nisbatan qariyb 0,4 foizga mustahkamlandi.
Biroq kurs tebranuvchanligi avvalgi yilga nisbatan biroz oshdi. 2026-yilning dastlabki yetti oyida o‘rtacha tebranuvchanlik 32 so‘m yoki 0,27 foizni tashkil etdi. 2025-yilning shu davrida esa bu ko‘rsatkich 28,2 so‘m yoki 0,22 foiz bo‘lgan.
Markaziy bank ma’lumotlariga ko‘ra, ichki valyuta bozorida xorijiy valyuta taklifining muhim manbalaridan biri xorijdan pul o‘tkazmalari hisoblanadi. 2026-yilning birinchi yarmida O‘zbekistonga 9,3 mlrd dollar miqdorida pul o‘tkazmalari kelib tushgan bo‘lib, bu o‘tgan yilning mos davriga nisbatan 13 foizga ko‘p.
